Lisa Simpson

我地成日會講，如果我仲有幾多日就死、如果世界末日黎，會點樣點樣做！
但今日睇咗一個 blog，令我諗到：當對我唯一重要既人要離開時，對我既影響，會仲大！大到我無辦法去承受！

如果生命就到盡頭既係我，我可能無乜所謂！
餘下既時間，都會係去做吓義工！可能去山區教書（呢個係我一直好想做既事，唔係去教一頭半個月，係去個到終老）！

我對死亡，可以話無乜恐懼。死亡只係另一個開始！以前成日同話劇妹講笑咁講：邊得你咁早安息主懷，咁易得你唔洗做！你就想啦！
係！死，只係去到父神到！實情都幾好！係個到又唔洗辛苦，唔洗諗交租，唔洗追貨期，唔洗驚嫁唔出！
所以我都話過：父，如果你要我為你死，真係無所謂，就算搵唔返條屍都無所謂（要條屍黎把鬼咩！搵到返黎都無人同我收啦！），但可唔可以個過程唔痛呢？（我都好人性嫁！）

但如果要離開嗰個係你最愛，或對你唯一重要既！我覺得 you just take something out of my heart, and there will be empty, forever！
當然，我希望佢可以信主，之後係天家都可以再見！可能如果有呢個頒望，都會好啲！如果知道以後都唔可以再見到佢，而我又留返係到，我真係會諗：我留係到做乜呢？真係不如早啲返天家啦！

我無家庭（起碼無人要我擔心），無朋友（起碼無人擔心我），無仔女（起碼唔係親生要靠我養）！工作上無乜特出表現！唔見得無咗我，呢個世界會有乜唔同！其實真有無我都無乜所謂！

所以人地話：仔女係人生命既延續，只有廷續，先會有將來，有將來先有頒望！
我無仔無女，孑然一身！其實乜都可以無所謂！

但當離開既人唔係你，而你係要留係到面對佢既離開！
其實真係好恐怖，恐怖到我無辦法想像！
我無辦法想像坐係佢床邊，睇住佢離開！
我無辦法想像去幫佢搞身後事！
我無辦法想像係靈堂我個表情會係點！
我無辦法想像點樣面對佢既遺物！
我什至唔知點樣一個人去坐平時同佢一齊坐既 sofa！

想到呢到，我冷笑咗一下！
原來我做咗咁多年人，由十幾歲到瑞士，到現在出黎打滾咁多年！乜都係要靠自己！
由搵學校，到搬屋！由讀書到做野！由香港去瑞士去英國再返香港，機票都無人幫我買過張！
從無人教過我條路要點行，永遠只有人不停話：你唔得嫁！
只有我對自己話：你得！你一定得！你一定要得！因為你唔得就死！無人會幫你，亦無人可以幫你！你無安全網！你一跌就萬劫不復，永不超生！
當我覺得就算天掉落黎，我都有本事頂住既時候！我終於發現有樣野我係唔敢面對！就連想都唔敢想像！

但呢一日越黎越近，無野可以左止或延遲！我已經開始感覺到佢佢既「寒」，我應該用呢段時間去學下點樣接受，亦或珍惜同盡量享受餘下既日子？

我無乜野可以為佢做，但我真係想帶佢去睇一次櫻花！