呢幾個星期都係食「媽媽食盒」。一是因為公司 D 飯真係好「例牌」，媽媽 D 飯都不知幾好食。當然通常都係之前嗰個晚嘅餸，但我的同事都說我的餸好正。
有一日我知道 D 餸係「梅子排骨」，到食飯時間就帶住飯盒去「叮叮」，我係有兩個盒；一個係裝飯；一個裝餸。因我媽媽唔想整到 D 飯「林」晒（係咪好細心呢！）。當我打開兩個飯盒時…嘩好多飯呀！應該話好多「盒」飯呀！兩盒都係飯嚟嫁！
大家可能問點解我咁都會攞錯，原因有幾個：一是因為自我帶飯後，家中的女人都「發現」帶飯可以慳好多錢，所以全家都帶飯，攪到成個雪櫃有成八個飯盒（四個女人，每人兩個飯盒），都幾難分邊個係邊個。二係我一直都用開其中兩個盒，一個放飯，一個放餸。問題就係呢到，兩個盒都係放咗飯。
其實都唔係媽媽嘅問題，因為我成日都好晚返，所以媽媽用咗其他盒幫我裝飯。所以帶咗「好多飯」嗰日我係要自己買午餐食，呢個話題比成班同事笑咗幾日，當然我都覺得好好笑，大家記住：N我仲要帶返 D 飯返屋企！你話死未？！
回應(6) | 回應的RSS | 暫時未有引用通告| 
(0)
嘩…真係唔多掂，本來今個星期係學電腦 system。老實講，電腦都算係我嘅強行，由上星期三到今早，我都非常之咁有信心。但係今日所學嘅嘢，真係令我信心全失。
真係唔知點解，今日所講嘅嘢，真係完全唔知點樣先可以記到入腦。仲有少少唔記得之前所學嘅嘢添，仲有呀，佢哋話之後考係張 D function 寫落紙到，你可以在電腦試吓入，但四十幾條問題，你吓吓入機來試，都唔洗旨意夠時間做。
其實每日每次比我哋嘅功課同練習我一 D 都唔驚，但無得入機又係另一回事。因為入咗機，有錯嘅都會比你知道，但如果唔入機，真係有可能少咗個符號都唔知。仲有佢哋話得分標準係 check in 到個客，但老實講，你少咗個豆號都 check in 唔到嫁啦！！
我自問係一個粗心大意嘅人，就算幾熟嘅題目都經常「少咗 D 嘢」，我都唔知點算，考幾次都未試過咁大壓力，真係唔知點死好。
回應(5) | 回應的RSS | 暫時未有引用通告| (0)
近排好少寫 D Leisure 嘅嘢，因為排真係做嘢做到唔識講笑（講到好似做苦要咁添）。所以都係寫返 D 好笑嘢先。
今日媽媽用柱侯醬來煮猪肉，，因為係李錦記，無乜味精（食唔出當佢無），所以真係好好食。我叫媽媽千其唔好倒咗 D 汁，留係雪櫃等我可以攞嚟送飯。但媽媽話呢 D 汁係留返，不停加羅白（唔知會唔會整到好似人哋嗰 D 三十年鹵水汁咁呢）。
令我諗起我以前在外國，真係一支（其實係一煲）鹵水汁走天涯。嗰時只有一個電飯煲，煮乜都係靠佢，所以會用佢嚟煲一大煲鹵水嘢（真係好難講係 D 乜，因為買到乜就落乜；例如有蛋、豆腐、肉、黃牙白我都試過，係無乜辦法嘅情況下，大家都會發揮到你嘅「小宇宙」），跟住送飯。
現在諗返起，真係唔知我嗰時點解可以日日食，都仲會覺得好食。可能因為嗰時唔食呢 D 就係食學校 D 嘢食。肥過肥仔水就唔洗講；仲要難食到無人信。
我哋都研究過，其實就算佢哋只係用滾水煮都好食過佢啦，身為酒店學院，煮 D 嘢竟然衰過全校學生，佢哋真係要…
其實我都依然覺得「家有一煲；如有一寶」，起碼做完成日嘢，返到屋企先發現個雪櫃係「吉」嘅，最少都仲有煲鹵水汁。可能大家會問，雪櫃係「吉」嘅，咁仲有 D 乜可以用嚟鹵呢。非也非也，當係呢 D 咁嘅「特別時期」仲煮乜呀，更係用 D 千年鹵水汁嚟撈飯。
大家唔好以為好慘呀，呢 D 加咗無數咁多嘅雞翅膀、雞肶、猪肉、豆腐、白羅白嘅鹵水汁，真係頂得住香港賣三、四十蚊碗嘅三十年牛腩麵。
但大家如果想自己整一煲家全鹵水汁，其實都好簡單，買支李錦記鹵水汁，用完後唔好倒咗佢，要煲返滾，莊入個瓶到，就算唔用都要間唔使就攞出嚟煲返滾（就算一直都係放係雪櫃內，都要返滾）。記住呀！要整「千年鹵水」係需要時間，我都想我媽媽整煲「家傳鹵水汁」比我做嫁妝呀！
今個星期係學電腦 system，聽聞好多人都係「死」係呢個科目，但我又唔係太驚，因為電腦一向我都幾強，已前學晒成個酒店 system都係咁啦！
現在都覺得 ok，當然都要溫吓書，但係可能我都係嗰 D 「可以同電腦溝通」嘅人，所以比小V真係好好多，都係嗰句，我真係有 D 擔心佢，幫到嘅我都盡量幫。
呢幾日都有出去同肥肥食飯，今個星期真係去多咗街，可以學電腦真係令我輕鬆 D。但我都係要溫吓書先，仲有我哋有家中都係溫吓 D code，無嗰個 system，都無得真係攞 D case 來溫。
我都諗住之後要早 D 返去用電腦來做吓 D case。仲要收到風今次考試係最難嘅一次，連個 trainner 都話佢咁有經驗，都要做成個鐘先做得完份卷。
但呢個 course 完咗之後，我哋就要落場，現在已經驚定先！
今個星期，星期一就係考試，考上星期讀嘅 Landside operation。大家都好擔心唔合格，因為唔想 re-sit，但個 passing rate 又成 80。當中最擔心嘅當然係小V。早兩日就比返 d 卷我哋睇，當中只有一個人唔合格；無錯…就係最唔 care 嗰個…小R。佢自己之前都知，因為佢話好多係「吉」咗好多。
結果小V當然 pass，小R 就預咗唔 pass。我就好開心，因為我係成班最高分
。其實都無諗過會有高分，係咁好彩有幾條題目都比我讀中咗，所以先會咁高分。
一收到成績，小V開心晒，我都忍唔住話佢：「你真係知道自己合格先有返 D 笑容喎！」我自己開心就因為我本來諗住都係 margin pass，但現在有 96.5分，真係好開心。但發生咗 D 令大家好 suprise（但其實我都估到 D）嘅嘢，就係即日，小 R比 HR Call 咗去，我哋但 trainner 都打去問點解，因為我哋嗰日係教 check in，如果唔上當，就真係乜都唔洗做。但最後都係要去見HR。
自嗰時起，我哋就無再見到小R。更係啦，佢唔係 margin 唔 pass，係差成條街，仲要佢 D 態度係完全唔在乎，週街同我哋講佢「吉」咗好多。佢都有前科嫁，其實佢係讀上個月嗰班，但因為「唔舒服」，所以請了兩日假，以佢個「天分」，當然要 delay 到今個月讀啦。其實 HR 已經好唔滿意，再加上佢返工就日日都遲五分鐘；頭又唔多梳；上堂又完全唔係到；功課又從來都唔做。真係無乜理由再有人會幫佢口。
小R係一個有 D 小聰明嘅人，但就真係完全唔在乎，相反小V個人就真係蠢蠢地，但做嘢就真係好認真（有 D 過份），仲係努力到得人驚（講你都唔信），呢個咪就係細個時媽媽會講嘅故事囉，不過係真嘅之碼！
回應(11) | 回應的RSS | 暫時未有引用通告| (0)
昨日就考咗 landside operation 嘅試，相信我都 OK 嘅（都要成 80 分先合格）。
但有個同事（以後叫佢小 Ｖ）真令人擔心！事原大家一考完試，就好例牌地在一起，大談答案。因為仲有 Ｄ 同學未考完，所以我哋都細細聲，亦無留意仲有邊個未出嚟。直至個 trainner 都出嚟，我哋都唔知所有人都已經考完。仲要等個 trainner 轉個頭返嚟同我哋講：「你哋掛住係到講，有個書友係女厠到喊呀！唔好話我講嫁！」
我哋當然即刻諗邊嗰係到喊，當然就係唔係我哋當中談考試題目的人啦（咪就係小Ｖ）。我哋即刻諗：「Ｄ 題目都唔係真係咁難姐，佢都讀得真係好熟嫁，呢Ｄ咁普通嘅問題應該難唔到佢格？！」
我哋就問吓佢係咪真係唔多唔識啦，佢就更係話係啦。但係 trainner 放完 break 返嚟話佢已經睇過小Ｖ份卷，佢合格嫁。
相信小Ｖ係因為太緊張，所以錯少少就覺得自己唔合格。其實係呢個時後大家都覺得小Ｖ 對考試大着緊，因為就算唔合格，都有一次補考機會。仲有只要考咗一次，就對考試方式又有一定清楚，真係難極有限，只係佢太緊張姐。
好啦，考完試之後，我哋就做 role play。又咁「好彩」，小Ｖ 分到做一個好精彩嘅 case，就係 ＤＢ（Ｄenied Ｂoarding，即係公司將機位超賣，客人有飛；有 booking；但上唔到機，個客理應當然係嬲到癡線啦）。但佢就一 Ｄ 都講/做唔到要做嘅嘢，因為佢真係唔知點同個客講。仲要做 role play 做到喊。
真係唔知到真正返工時點頂得順！佢係嗰 Ｄ 連講早晨都唔會大聲嗰隻，但都係嗰句：佢個人無乜嘢！所以大家都好努力諗點樣可以幫佢練大膽。
其實我哋呢班都係幾「夾」，又好齊心，唔會大家比呢樣比嗰樣。除了其中一個女仔（小Ｒ），我相信佢真係幾難可以同大家念熟。因為佢真係一個只係掛住玩嘅人，有 Ｄ 乜事就「嗲」班中唯一嘅男同事。上堂就永遠都係遊雲。做嘢求求其其就算，成日話想快 Ｄ 上完堂，可以正式返工（因為小Ｒ完全無心機學嘢），但你讀書呢 part 都求其成咁，比你返工唔做錯嘢先奇。
昨日我忍唔住同另一個同事講，佢嘅睇法同我嘅係一樣。雖然我對小Ｖ同小Ｒ嘅前境都唔係咁樂觀，但我哋當然係用唔同方法去睇呢件事啦。小Ｖ就真係會幫得就幫，但小Ｒ就唔該你自己攪掂。
回應(4) | 回應的RSS | 暫時未有引用通告| (0)
